Habil Əliyevin vida mərasimi keçirildi

Xalq artisti, şöhrət ordenli, məşhur kamança ifaçısı Habil Əliyevin vida mərasimi keçirilib. 

     Xalq artisti, şöhrət ordenli, məşhur kamança ifaçısı Habil Əliyevin vida mərasimi keçirilib. Azərbaycan Dövlət Filarmoniyasında keçirilən vida mərasimində sənət aləminin tanınmış simaları, mərhumun ailəsi iştirak edirdi. Mərhumun xanımı Şəfiqə Əliyeva kədərini bizimlə bölüşüb: “Habilin ömrü bura qədər imiş. İnsanlar onu çox sevirlər. Ona görə də Habilin xatirəsi, sənəti, kamançası hər zaman yaşayacaq. Habil heç nədən nigaran getmədi. Həmişə deyirdi ki, həyatda mənə hər şey qismət olub. Xalq da, dövlət də Habili çox sevib, çox qiymətləndirib”.

Nəzərinizə çatdıraq ki,  xalq artisti səhhətində yaranan problemlərə görə avqustun 15-də ürək və tənəffüs çatışmazlığı diaqnozu ilə xəstəxanaya yerləşdirilmişdi. Daha sonra ifaçının səhhəti normallaşmış, müayinəsini evdə davam etdirməsi üçün avqustun 22-də evə buraxılmış, bir neçə gün əvvəl isə yenidən komaya düşmüşdü. 

    Vida mərasimində Habil Əliyevin sənət dostları da çox böyük kədər içində idilər. Sənətkarı son mənzilə yola salarkən onu sevənlər göz yaşlarına boğulublar.  Tədbirdə mədəniyyət və turizm naziri Əbülfəs Qarayev də iştirak etdi. Mərasimdə kaman ustasının nəvəsi də hisslərini sənətkarı anmağa gələnlərlə bölüşüb.

 

 

Sevda Məmmədova

Elfaq Lələyev

 

Muz-Tv.az