Bu gün Azərbaycanın birinci xanımı Mehriban Əliyevanın ad günüdür

Analıq missiyasını həyatının ən vacib missiyası kimi dəyərləndirən  və valideyn himayəsindən məhrum olmuş uşaqlara qayğı ilə ...

Analıq missiyasını həyatının ən vacib missiyası kimi dəyərləndirən  və valideyn himayəsindən məhrum olmuş uşaqlara qayğı ilə seçilən , Azərbaycanın birinci xanımı, Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın doğum günüdür. O, Azərbaycan Milli Elmlər Akademiyasının akademiki, fizika-riyaziyyat elmləri doktoru, professor, Milli Aviasiya Akademiyasının rektoru Arif Mir Cəlal oğlu Paşayevin ailəsində dünyaya gəlib. Azərbaycan Dövlət Tibb İnstitutunun müalicə-profilaktika fakültəsinə daxil olan  Mehriban Əliyeva1988-ci ildə İ.M.Seçenov adına Birinci Moskva Dövlət Tibb İnstitutunu fərqlənmə diplomu ilə bitirib. 2012-ci ildən həmin universitetinin fəxri professorudur. 1995-ci ildə Mehriban xanım Əliyevanın təşəbbüsü ilə hazırda onun rəhbərlik etdiyi Azərbaycan Mədəniyyət Fondu təsis olunub. Bir il sonra Mehriban xanım Əliyeva Azərbaycan mədəniyyətinin geniş təbliğ olunması məqsədilə üç dildə Azərbaycan, ingilis və rus dillərində çap olunan “Azərbaycan - İrs” jurnalını təsis edib. Bu nəşrin sayəsində Azərbaycan beynəlxalq arenada təkcə neft və qazla zəngin dövlət kimi deyil, həm də digər sahələrdə - musiqi, memarlıq, təsviri və tətbiqi incəsənət sahələrində də şedevrlər yaratmış ölkə kimi tanınmağa başlayıb. 10 may 2004-cü ildə Heydər Əliyev Fondu yaradılır və Azərbaycanın birinci xanımı bu fonda rəhbərlik etməyə başlayır. Fondun məqsədi ümummilli lider Heydər Əliyevin zəngin irsinin öyrənilməsi və yeni nəslin milli dövlətçilik ideyaları ruhunda tərbiyə edilməsidir. Fondun işinin prioritet istiqamətləri ən müxtəlif sahələrdə humanitar fəaliyyətdən ibarətdir. Bura valideyn himayəsindən məhrum olmuş uşaqlara kömək, uşaq evlərinin, internat-məktəblərinin abadlaşdırılması və maddi bazalarının yaxşılaşdırılması da daxildir. 2004-cü ilin avqustunda Mehriban xanım Əliyeva Azərbaycanın şifahi xalq ədəbiyyatının və musiqi irsinin mühafizəsi və inkişafı üzrə yorulmaz səylərinə görə YUNESKO-nun xoşməramlı səfiri elan olunub. İki il sonra birinci xanım müxtəlif sahələrdəki genişmiqyaslı və fədakar fəaliyyətinə, o cümlədən geniş sivilizasiyalararası dialoq, qayğıya ehtiyacı olan uşaqlara diqqət, onların həyat şəraitinin və təhsilinin yaxşılaşdırılmasında böyük dəstəyinə görə İSESKO-nun (İslam ölkələrinin elm, təhsil və mədəniyyət təşkilatı) xoşməramlı səfiri seçilib. 2010-cu il iyulun 30-da Mehriban Əliyevaya YUNESKO-nun "Qızıl Motsart" medalı təqdim olunub. Xoşməramlı səfir kimi Mehriban Əliyevanın vəzifəsi elm, mədəniyyət, təhsil vasitəsilə İslam dünyasının malik olduğu bütün imkanları, Qərbin və Şərqin, eləcə də müxtəlif sivilizasiyaların bir-birinə nə qədər maraqlı və faydalı ola bilməsini göstərməkdir. 2005-ci ildə Azərbaycanda keçirilən sosioloji sorğunun nəticələrinə görə, Mehriban Əliyeva "İlin qadını" fəxri adını alıb. Mehriban Əliyeva 2005-ci və 2010-cu illərdə Azərbaycan parlamentinin deputatı seçilib. 2006-cı ilin mart ayında Mehriban Əliyeva mədəni-mənəvi dəyərlərin qorunmasında verdiyi töhfəyə görə, BMT-nin Ümumdünya Əqli Mülkiyyət Təşkilatının (ÜƏMT) qızıl medalına layiq görülüb. Dünya Səhiyyə Təşkilatı İcraiyyə Komitəsinin 2007-ci il yanvarın 29-da Cenevrədə keçirilmiş 120-ci sessiyasının yekdil qərarı ilə Mehriban Əliyeva "Ana, uşaq və ailə sağlamlığının qorunması və möhkəmləndirilməsi işində müstəsna xidmətlərinə görə" xüsusi mükafatı ilə qiymətləndirilib. Xeyriyyəçilik fəaliyyətinə, bəşəriyyətin ali ideallarına xidmət sahəsində nailiyyətlərinə görə Mehriban Əliyeva 2007-ci ildə "Qızıl Ürək" beynəlxalq mükafatə ilə təltif olunub. 2009-cu ilin martında Mehriban xanım Əliyevanın rəhbərlik etdiyi Heydər Əliyev Fondunun təşəbbüsü və təşkilati dəstəyi ilə dünyada ilk dəfə olaraq “Muğam aləmi” Beynəlxalq Muğam Festivalı keçirilib. 2011, 2013, 2015-ci illərdə də keçirilən festivallarda dünyanın müxtəlif ölkələrindən tanınmış musiqiçi və tədqiqatçılar iştirak edib. Festivallar çərçivəsində həm Bakıda, həm də ölkəmizin bir çox bölgələrində Azərbaycanın və xarici musiqiçilərin iştirakı ilə konsertlər keçirilib, beynəlxalq muğam müsabiqəsi, beynəlxalq elmi simpozium və ustad dərsləri təşkil olunub. Bir sözlə, Birinci xanımın təşəbbüsü ilə muğamın dünyada tanınması üçün böyük işlər görülüb və görtülməkdədir. Azərbaycan Respublikasının Prezidenti İlham Əliyevin 5 may 2009-cu il tarixli sərəncamı ilə Mehriban Əliyeva ölkənin ictimai-siyasi və mədəni həyatında səmərəli fəaliyyətinə görə Heydər Əliyev Mükafatına layiq görülüb. 2013-cü ilin fevralında Mehriban Əliyeva türk mədəniyyətinin qorunmasında və təbliğində xidmətinə görə "Türk mədəniyyətinin hamisi" adına layiq görülüb. Mehriban Əliyeva hakim Yeni Azərbaycan Partiyasının Elə həmin ilin iyununda keçirilən V qurultayında partiyanın sədr müavini seçilib. Fransanın Ərəb Mədəni İrsi Mərkəzi və Misirin "Nefertiti Media Productions" şirkətinin birgə keçirdiyi sorğunun nəticəsinə görə, Mehriban Əliyeva "2014-cü ilin ən nüfuzlu qadını" adına layiq görülüb. Mehriban Əliyeva YUNESKO-nun xoşməramlı səfiri kimi fəaliyyətindəki xüsusi xidmətləri nəzərə alınmaqla, həmçinin mədəniyyətin təbliği və beynəlxalq mədəniyyət mübadiləsi, elm, səhiyyə, idman, təhsil, texnologiya və ekologiyanın inkişafı işinə verdiyi töhfəyə görə bu ada layiq görülüb. Azərbaycanın birinci xanımının xidmətləri sırasında, həmçinin Bakıda Beynəlxalq Muğam Mərkəzinin yaradılması, valideyn himayəsindən məhrum olmuş uşaqlara kömək göstərilməsi və digər çoxsaylı xeyriyyə aksiyaları qeyd edilib. 2014-cü il mayın 14-də Bakıda "The Business Year: Azerbaijan-2014" nəşrinin təqdimat mərasimi keçirilib. Təqdimat mərasimində Mehriban Əliyevanın Azərbaycanın ictimai, sosial və mədəni həyatında fəal iştirakına, cəmiyyətin dinamik inkişafına verdiyi mühüm töhfələrə, mədəniyyətimizin dünyada təbliği sahəsində əvəzsiz xidmətlərinə, həmçinin ümumdünya mədəni irsinin qorunub saxlanılması işinə hərtərəfli dəstəyinə, sosial ədalət və humanizm prinsiplərinə sadiqliyinə görə dünyada "İlin Birinci Xanımı" mükafatına layiq görüldüyü elan edilib. 2013-cü il yanvarın 17-də Azərbaycan Prezidenti İlham Əliyev I Avropa Oyunlarının 2015-ci ildə Bakı şəhərində keçirilməsi üzrə Təşkilat Komitəsinin yaradılması haqqında sərəncam imzalayıb. Sərəncama görə, komitənin sədri Heydər Əliyev Fondunun prezidenti, Azərbaycan Respublikası Milli Olimpiya Komitəsi İcraiyyə Komitəsinin üzvü Mehriban xanım Əliyeva təyin edilib. Avropa ölkələri Oyunlarda 6 min idmançı ilə təmsil olunub. İdmançılar 253 dəst medal uğrunda mübarizə aparıblar. 42 ölkə təmsilçisi bu mübarizələrdə mükafatçı adına layiq görülüb. 300-ə yaxın azərbaycanlı idmançı Oyunlarda iştirak edib. Onlar 56 (21 qızıl, 15 gümüş və 20 bürünc) medal qazanıblar ki, bunun sayəsində Azərbaycan medal hesabına görə yarışlarda ikinci olub. Avropa Oyunları yarışları dünyanın 145 ölkəsində geniş işıqlandırılıb. Yalnız açılış mərasimi 140 ölkədə yayımlanıb. Bütün dünyada 1100 saatdan çox yayım hazırlanıb. Ümumilikdə Avropa Oyunlarının tamaşaçı auditoriyası təqribən 823 milyon nəfərə çatıb. Birinci Avropa Oyunlarında qalib gəlmiş idmançılarımız, onların məşqçiləri, Azərbaycan idman ictimaiyyətinin nümayəndələri və Oyunların təşkilində xidmətləri olmuş xarici tərəfdaşlarla görüşü zamanı Prezident İlham Əliyev Mehriban xanım Əliyevanın xidmətlərini yüksək dəyərləndirib. Mehriban Əliyeva Azərbaycanda mədəniyyətin, təhsilin, səhiyyənin və idmanın inkişafında səmərəli fəaliyyətinə, Azərbaycan xalqının mədəni irsinin beynəlxalq miqyasda geniş təbliğinə və I Avropa Oyunlarının təşkilində böyük xidmətlərinə görə “Heydər Əliyev” ordeni ilə təltif edilib. Azərbaycan mədəniyyətinin populyarlaşdırılması və təbliği məqsədilə Heydər Əliyev Fondunun təşəbbüsü ilə Azərbaycan iyulda yenidən bütün dünyadan olan çoxsaylı qonaqları VII Qəbələ Beynəlxalq Musiqi Festivalında qəbul edib. Heydər Əliyev Fondu görkəmli Azərbaycan ifaçılarının musiqi albomlarının buraxılmasına böyük diqqət yetirir. Fond, həmçinin "Azərbaycan muğamı" multimedia məcmuəsi və "Muğam dünyası" kitabını nəşr etdirib. Bakıda Mehriban Əliyevanın təşəbbüsü ilə Müasir İncəsənət Muzeyi açılıb və fəaliyyət göstərir. Fond ümumbəşəri mədəniyyət abidələrinin bərpasında da iştirak edir. Belə ki, dünya irslərinin siyahısına daxil olan Parisin Versal sarayının parkında zamanın və iqlimin təsirindən zərər çəkmiş iki abidənin bərpası həyata keçirilib. Bu ilin aprel ayında Prezident İlham Əliyev, xanımı Mehriban Əliyeva və ailə üzvləri İslam dünyasının əsas müqəddəs şəhəri Məkkədə ümrə ziyarətində olublar. Heydər Əliyev Fondunun xətti ilə Azərbaycanda bir çox məscid, sinaqoq və kilsələr bərpa olunub. Mehriban Əliyeva Azərbaycan xalqının rifahına xidmət edən humanitar proqramların səmərəliliyinin gücləndirilməsi üçün bütün mövcud imkanlardan istifadə etməyi ümdə vəzifəsi hesab edir. Heydər Əliyev Fondunun fəaliyyətinin prioritet istiqamətlərindən biri dünya ictimaiyyətinə Dağlıq Qarabağ münaqişəsi ilə bağlı reallıqların çatdırılmasıdır. Həyata keçirilmiş layihələr arasında bir neçə dildə nəşr edilmiş, Ermənistanın Azərbaycana təcavüzünün tarixini əks etdirən "Qarabağ reallıqları" bukletlər toplusunu, erməni vəhşiliyindən bəhs edən "Müharibə və mədəni-tarixi abidələrimiz", "Azərbaycana qarşı müharibə: mədəni irs hədəf altında" kitablarını qeyd etmək olar. Bundan başqa, Fond dünyanın müxtəlif ölkələrində Xocalı soyqırımına həsr olunmuş aksiyalar, foto və video sərgilər təşkil edir. Mehriban Əliyevanın fəaliyyətinin əsas istiqamətlərindən biri Azərbaycan mədəniyyətinin dünyada təbliğ olunmasıdır. Bu il iyulun 9-da “Milan Expo 2015” Ümumdünya sərgisində Heydər Əliyev Fondunun və Heydər Əliyev Mərkəzinin təşəbbüsü ilə yaradılmış Azərbaycan pavilyonunda “Milli gün” təşkil olunub. “Milli gün” çərçivəsində Azərbaycan pavilyonunun rəsmi təqdimat mərasimi keçirilib. Azərbaycan Respublikasının Prezidenti İlham Əliyev və xanımı, Heydər Əliyev Fondunun prezidenti Mehriban Əliyeva mərasimdə iştirak ediblər. Tədbirə, həmçinin İtaliya hökumətinin nümayəndələri, ictimai xadimlər, bu ölkədəki diplomatik korpusun təmsilçiləri və digər nüfuzlu qonaqlar da qatılıblar. Bu il iyulun 14-də Heydər Əliyev Fondunun təşkilatçılığı ilə Kann şəhərində Azərbaycan Mədəniyyəti Günlərinin açılış mərasimi keçirilib. Mərasimdə Azərbaycanın Birinci xanımı Mehriban xanım Əliyeva və ailə üzvləri iştirak edib. İyulun 15-də Kannda keçirilən Azərbaycan Mədəniyyəti Günləri çərçivəsində Festivallar sarayında “Azərbaycan xalçaları incəsənətdə” sərgisinin açılışı olub. Açılış mərasimində Azərbaycanın birinci xanımı, Heydər Əliyev Fondunun prezidenti Mehriban Əliyeva və ailə üzvləri iştirak ediblər. Heydər Əliyev Fondunun təşkilatçılığı ilə keçirilən sərgidə Azərbaycan xalça sənətinin tarixi, müasir dövrü, dünyada geniş yayılması barəsində ziyarətçilərə ətraflı məlumat verilib. Birinci xanımın doğum günündə www.mehriban-aliyeva.az - adlı rəsmi saytı yeni dizaynda istifadəyə verilib. Sayt Mehriban Əliyevanın həyatı və ictimai-siyasi fəaliyyətini əks etdirir. Azərbaycan, rus və ingilis dillərində hazırlanmış saytda, həmçinin Azərbaycanın birinci xanımı Mehriban Əliyevanın təltif olunduğu müxtəlif mükafatlar barədə məlumatlar, mətbuatda yer almış məqalələr yerləşdirilib. İzləyicilər saytın foto və video bölməsində Mehriban Əliyevanın ictimai-siyasi fəaliyyəti ilə yanaşı, ailə fotoalbomu, eyni zamanda ölkənin birinci xanımının iştirak etdiyi ayrı-ayrı tədbirlər, görüşlər zamanı maraqlı anları əks etdirən fotolarla da tanış ola bilərlər. Saytda uşaqlar üçün səhifə də yaradılıb. Bu səhifədə Mehriban Əliyevanın çoxşaxəli fəaliyyətində uşaqlara qayğının əsas yer tutması barədə məlumat verilir.

 

Muz-Tv.az