“Bakı-2015” ilk Avropa Oyunlarının açılışından möhtəşəm görüntülər

Nəhayət, çoxdan gözlənilən “Bakı-2015” ilk Avropa Oyunlarının Olimpiya Stadionunda möhtəşəm açılışı reallaşıb. 

    Nəhayət, çoxdan gözlənilən “Bakı-2015” ilk Avropa Oyunlarının Olimpiya Stadionunda möhtəşəm açılışı reallaşıb. Unudulmaz gecənin açılışına xalq artisti Alim Qasımovun ifası ilə start verilib. Daha sonra 50 ölkənin bayraqlarının kompozisiyası qurulub. Möhtəşəm açılışın ardınca üçrəngli bayrağımız göyə ucaldı və daha sonra İki dəfə paralimpiya oyunları çempionu, iki dəfə dünya çempionu, beş dəfə Avropa çempionu İlham Zəkiyev Jan Sibeliusun “5-ci Simfoniya”sının sədaları altında birinci Avropa Oyunlarının məşəlini stadiona gətirib. Hər kəsi heyrətə gətirən şou gecə boyunca davam edib. Belə ki, dahi şair Nizami Gəncəvinin  əsərlərindən ibarət kompozisiya yaradılıb. Leyli obrazını  Patrisiya Zarnoviçian, Məcnunu isə Markez Skot canlandırıb. Daha sonra Avropa oyunlarının rəsmi simvolu olan nar göydə uçaraq səhnədə yerini tapıb.

    Nəhayət 6000 idmançının yer aldığıə əlli ölkənin nümayəndələri bayrağı ilə stadionda dövr etməyə başlayıb. Xalqların paradı Olimpiya oyunlarını dünyaya bəxş etmiş ölkəyə hörmət əlaməti olaraq Yunanıstan öndə olmaqla başlayıb. Paradı ev sahibi Azərbaycan başa vurdu.  Ölkəmiz Oyunlarda 291 idmançı ilə təmsil olunub. Möhtəşəm gecənin ulduz qonağı Ledi Qaqa olub. İfaçı Con Lennonun repertuarından "İmagine" mahnısını ifa edib. Möhtəşəm gecə sürprizlərlə davam edib. Səhnədə göstərilən şoular  Avropadan gələn qonaqları heyrətə bürüyüb. Qaranlıqda  Alim Qasımovun muğam ifası sədaları altında  yerlərdə bitən gül-çiçəklər cücərir və Xəzər dənizinin rəmzi nümayiş olunub. Ardınca Qobustanın qədim qayaüstü təsvirləri səhnədə canlanır və sükutu balabanda ifa olunan Azərbaycan xalq mahnısı “Sarı gəlin”in sədaları pozub. Və nəhayət möhtəşəm gecənin açılış mərasimi atəşfəşanlıqla sona çatıb.

 

Sevda Məmmədova

 

Muz-Tv.az