Elnur Hüseynovun Vyana səhnəsində ilk rəsmi məşqi

Azərbaycanı "Eurovision 2015"də təmsil edən müğənni Elnur Hüseynov Vyana səhnəsində ilk rəsmi məşqinə çıxıb. 

     Azərbaycanı "Eurovision 2015"də təmsil edən müğənni Elnur Hüseynov Vyana səhnəsində ilk rəsmi məşqinə çıxıb. Axşam.az-ın məlumatına görə, onunla birgə səhnədə tanınmış rəqqaslar və vokalçılar çıxış edəcək. Onlar müğənniyə səhnədə mükəmməl şou yaratmasına kömək edəcəklər. Elnur üçün hazırlanan performansın xüsusi mənası var. Belə ki, "Hour of the wolf" mahnısının "qəhrəmanı" vəhşi və yalnız qurddur. O, öz səsiylə gücünü göstərmək istəyir. İfaçının yanında rəqs edən qadın və kişi qurdun hərəkətlərini yamsılayacaqlar. Qurd kimi boz rəngdə geyinən rəqqaslar dalaşmaq istəyərkən Elnur onlar arasında barışdırıcı mövqedə duracaq. Səhnədə bədirlənmiş ayın təsviri də qurdun zamanının gəldiyinə işarədir. E.Hüseynovun çıxışının sonunda isə səhnədə ağ göyərçin görünəcək.

    Müğənni Nadir Qafarzadə "Oğlum evlənir" adlı yeni mahnısını təqdim edib. Sənətçi açıqlamasında bəstənin sözlərinin və musiqisinin Samir Vidaya məxsus olduğunu bildirib: "Bəstəyə qulaq asan kimi bəyəndim. Mahnını oxuyan zaman isə qəribə hisslər keçirdim. Elə bildim ki, sanki oğlumun toyunda oxuyuram. Hər bir valideynin arzusudur ki, övlad toyu görsün. Mənim də iki oğlum var. İstəyirəm ki, Allah ömür versin və iki oğlumun toyunu görüm. Valideyn kimi öz üzərimə düşən nə varsa, onlar üçün etmişəm. Bundan sonra da etməyə hazıram. Hazırda böyük övladım xarici ölkədə təhsil alır, bir neçə il sonra isə ailə qurmaq barədə düşünəcək. Mən də istəyirəm ki, nəvəm olsun".

     Pərəstişkarları müğənni Röya Ayxana sürpriz hazırlayıb. Onlar ifaçının “Bakı 2015” mahnısına klip çəkib, nitq qüsurlu insanlara dəstək üçün orada işarə dilindən istifadə ediblər. Ona qarşı edilən bu jesti çox bəyəndiyini bildirən R.Ayxan hər kəsə təşəkkür edib: “Qoy, bütün Azərbaycan sevinsin. Bütün dünya ölkəmizin az bir müddətdə nələrə qadir olduğunu görsün. Hər bir uğurun arxasında əziyyət durur. Səbrli olun. Ölkəmiz hamıya və hər şeyə dəstək olacaq. Onsuz hamının problemi var. Kasıbımız da var... Elə bilməyin ki, mən rahat yatıb-dururam. Amma həyat bizi əzməməlidir. Hər günümüzə şükr edək. Siz məni qınasanızda sizi sevirəm. Bu video məni xoşbəxt etdi. Çox sağ olsunlar”.

    “Eurovision 2011” qalibi Nigar Camal qızları ilə futbol oynayıb. Müğənni həmin an lentə aldığı videonu sosial şəbəkədə paylaşıb. Qeyd edək ki, N.Camal qızları Səidə və Jasminlə birlikdə Londonda yaşayır.

 

Əhəd Miriyev

 

Muz-Tv.az