Səməd Səmədov 15 il əvvəl oxuduğu mahnıya klip çəkdirdi

Xalq artisti Səməd Səmədov mərhum bəstəkar Elxan Rəhimovun “Azəri balasıyam” adlı mahnısına klip çəkdirib. 

     Xalq artisti Səməd Səmədov mərhum bəstəkar Elxan Rəhimovun “Azəri balasıyam” adlı mahnısına klip çəkdirib. Axşam.az-a açıqlama verən müğənni ekran işini bu gün təqdim etdiyini bildirib: "Mahnını 15 il əvvəl oxumuşdum. Dinləyicilərin istəyini nəzərə alıb, yenidən aranjiman etdirdim. Qərar verdim ki, bəstəyə klip də çəkdirim. Hər kəsə məlumdur ki, bu yaxınlarda Azərbaycanda Avropa Oyunları keçiriləcək. Bu önəmli hadisədə mənim də bir töhfəm olmasını istədim. Klipdə paytaxtımızın tarixi məkanları əks olunub”. “Azəri balasıyam” klipinin rejissoru Əli, prodüseri Rövşən Cəfərovdur.

    Meyxanaçı Namiq Qaraçuxurlunun növbəti duet ortağı əməkdar artist Elza Seyidcahan olacaq. Bu haqda E.Seyidcahan açıqlamasında bildirib. “Ötən ildən Namiqlə duet oxumağı planlaşdırırdıq. Mətanət İsgəndərli, Elton Hüseynəliyev, Gülay Zeynallı üçün mahnılar yazdım, başım qarışdı. "Əcəb edirəm” adlı mahnı bəstələmişəm. Sözləri Baba Pünhana aiddir. Burada həm estrada, həm caz, həm də dərviş tərzi var. Mahnımız aranjimandadır, yaxın günlərdə təqdim edəcəyik. Bu bəstəyə klip də çəkdirəcəyik”. İddialı danışan E.Seyidcahan bu işbirliyinin N.Qaraçuxurlunun xalq artisti Aygün Kazımova ilə duetlərindən üstün olacağını deyib: “Bu duet Namiqin yaradıcılığında yenlik olacaq. Həmişə Elza deyəndə, ağla fərqlilik gəlir. Onu da deyim ki, bizim mahnımız Namiqin Aygünlə duetini kölgədə qoyacaq”.

    "Eurovision” təmsilçilərimizdən olan Safurə Əliyevanın oğlu İsgəndərin 1 yaşı tamam olub. İş adamı Fərhad Əliyevlə ailə quran S.Əliyeva övladının ad gününü yaxınları ilə qeyd edib. Həmin gün, eyni zamanda İsgəndərin sünnəti də baş tutub. Qeyd edək ki, S.Əliyeva ailə qurduqdan sonra səhnədən gedib. O, hazırda həyat yoldaşı ilə birlikdə İstanbulda yaşayır.

    Müğənni Elton Hüseynəliyev yay istirahəti ilə bağlı planlarından danışıb. Sənətçi açıqlamasında bunları bildirib: “Ölkəmizdə Avropa Oyunları kimi çox önəmli hadisə olacaq. İnsanlar televizorda o möhtəşəm hadisəni izləsinlər. Biz layihələrdən pul qazanmırıq, əksinə pul xərcləyirik. Buna görə də hansısa işimiz alınmaz, gəlirimiz olmaz qorxumuz yoxdur.Bu yay istirahət edəcəm. Heç bir yenilik planlaşdırmıram. Eyni tərzdə mahnılardan yoruldum.Mən də bütün yayı fərqlilik axtarışında olacam. Şəxsi işlərimlə bağlı Almaniya, İtaliya və Amerikaya yollanacam. İlin sonunda yeni mahnılar, albom və konsert təqdim edəcəm”.

 

Əhəd Miriyev

 

Muz-Tv.az