Elnur Hüseynov İstanbulda klip çəkdirib

Ölkəmizi bu il “Eurovision”da təmsil edəcək müğənni Elnur Hüseynov “Hour of the Wolf” mahnısını türkcə oxuyub. 

    Ölkəmizi bu il “Eurovision”da təmsil edəcək müğənni Elnur Hüseynov “Hour of the Wolf” mahnısını türkcə oxuyub. Axşam.az-ın məlumatına görə, ifaçı “Qaranlıqlara təslim olmam” adını verdiyi bəstəyə İstanbulda klip də çəkdirib. Klip ilk dəfə E.Hüseynovun Türkiyədə keçirdiyi partidə yayımlanıb. Qeyd edək ki, “Eurovison 2015”in I və II yarımfinalı müvafiq olaraq mayın 19 və 21-də, final mərhələsi isə 23-də keçiriləcək. Təmsilçimiz ikinci yarımfinalda 11-ci nömrə altında çıxış edəcək.

    Müğənni Eldar Qasımov şəxsi həyatı ilə bağlı açıqlamalar verib. İfaçı açıqlamasında evləndikdən sonra şou-biznesdən gedəcəyini bildirib: “Evlənmək mənim karyeramın sonu deməkdir. Çünki ailə qurduqdan sonra müğənnilikdən uzaqlaşacam. Özümü xanımıma və övladlarıma həsr edəcəm. Ola bilər ki, bir müddətdən sonra yenidən sənətə qayıda bilərəm. Hələ ki, edəcəyim layihələr var. Ona görə də belə tezliklə subaylığın daşını atmağı düşünmürəm”.

     Repçi Elmir “Gic-gicə” adlı mahnısına çəkdirdiyi klipini təqdim edib. Mahnının sözləri ifaçının özünə məxsusdur. Ekran işinin həlli rejissor Emin Quliyevə həvalə olunub.

     Müğənni İlhamə Qasımovaya at hədiyyə ediblər. İfaçı bu haqda açıqlamasında bildirib: “Bu günlərdə atla foto paylaşdım. O, mənim deyil. Sadəcə adını mən qoymuşam. Mənim özümə isə ağ rəngdə at hədiyyə ediblər. Bu yaxınlarda 10 yaşı olacaq. Baxmayaraq ki, atım var, amma çapmağı bacarmıram”.

 

Əhəd Miriyev

 

Muz-Tv.az