Elnur Hüseynov parti keçirəcək

Ölkəmizi bu il “Eurovision”da təmsil edəcək Elnur Hüseynov parti keçirəcək. 

   Ölkəmizi bu il “Eurovision”da təmsil edəcək Elnur Hüseynov parti keçirəcək. Axşam.az-ın məlumatına görə, bu haqda İstanbulda yaşayan ifaçının rəsmi "Facebook" səhifəsində yazılıb. “Elnur “Eurovision” üçün Türkiyəni tərk etmədən əvvəl sevənlərinə sürpriz edəcək. Parti canlı olaraq “Facebook”, “Twitter”, “Youtube”-da yayımlanacaq” deyə, məlumatda bildirilib. Gecəni canlı izləyən tamaşaçılardan 20-si Vyanada keçiriləcək “Eurovision”-a bilet əldə etmək şansı qazanacaq. Partinin qonaqlarının adı gizli saxlanılır. Tədbir mayın 6-da İstanbulda baş tutacaq.

   Müğənni Röya Ayxan yeni klip çəkdirir. Ekran işi “Bakı-2015” Avropa Oyunlarına həsr olunub. İfaçı bu haqda sosial şəbəkədə yazıb. O, klipdə pərəstişkarlarını da çəkəcəyini qeyd edib: “Bu xəbər Azərbaycanı və məni sevənlər üçündür: Avropa Oyunları ilə bağlı klip çəkirik. Yanımda yer alsanız, klipi bir yerdə canlandırsaq, xoşbəxt olaram. Mənimlə bir klipdə oynamağa hazırsınız?”. Qeyd edək ki, mahnının sözləri və musiqisi Muxtar Abseynova məxsusdur.

   Müğənni İlhamə Qasımova işləməkdən yorulub. İfaçı bu haqda açıqlamasında bildirib. O, ailədə xanımın çalışmasından bəhs edib: “Özünə güvənməyən kişilər qadına etibar etmir. Özü kənarda başqa qadınlarla gəzir, ona görə də xanımına çalışmağı qadağan edir. İşgüzar qadının maaşı kişidən çox olmamalıdır. Yoxsa bəzi xanımlar kişinin başına vurur ki, mən evə səndən çox pul gətirdim. Kişi evin böyüyü olmalıdır. Çalışan qadın bəlli bir yaşdan sonra yorulur, evdə oturmaq istəyir. Bu yorğunluq məndə də var. Yorulmuşam, əvvəlki kimi çalışmağa can atmıram. Amma kişi yaşının sonuna kimi əlləşib-vuruşur. Buna görə də güclü cinsin nümayəndələrini alqışlamaq lazımdır”.

    “Eurovision 2011” qalibi Eldar Qasımov builki təmsilçimiz E.Hüseynovun ikinci dəfə “Eurovision”a qatılmasına münasibət bildirib: Sənətçi açıqlamasında bunları söyləyib: “Bəzi iştirakçılar var ki, sözügedən müsabiqədə birinci, ikinci yeri tutur. Öz sözünü deyə bilmir. Amma elə iştirakçı olub ki, 25-ci yerdə qərarlaşıb. Sonradan məşhur olub. Elnur səkkizinci yer tutub. Öz sözünü deməyib. İnanıram ki, bu il mahnısıyla sözünü deməyi bacaracaq. Mən ikinci dəfə yarışmaya qatılmazdım. Çünki ən yüksək zirvəni, birinci yeri tutdum. Mənim üçün o müsabiqə geridə qaldı. Hazırda isə tamaşaçıların diqqətini çəkmək üçün yeniliklər təqdim etməyə çalışıram”.

 

Əhəd Miriyev

 

Muz-Tv.az