Emin Qriqoriy Lepslə birlikdə Bakıda konsert verəcək

İfaçı-bəstəkar Emin Bakıda daha bir konsert verəcək. Axşam.az-ın məlumatına görə, o, iyunun 27-də sahibi olduğu “Sea Breeze”də konsert...

   İfaçı-bəstəkar Emin Bakıda daha bir konsert verəcək. Axşam.az-ın məlumatına görə, o, iyunun 27-də sahibi olduğu “Sea Breeze”də konsert proqramı ilə çıxış edəcək. Gecədə Eminlə birlikdə səhnəni rusiyalı ifaçı Qriqoriy Leps paylaşacaq. Qeyd edək ki, Emin iyulun 17-də "Yaşıl Teatr"da da çıxış edəcək.

   Əməkdar artist Abbas Bağırovun “Qəfil gedişinlə” adlı mahnıya çəkdirdiyi klipi uğursuz alınıb. Sənətçi bu haqda açıqlamasında danışıb. Onun sözlərinə görə, rejissorun vədi özünü doğrultmayıb: "Klipi bəyənmədim. Çəkiliş üslubu, dizayn, süjet xətti yaxşı deyildi. Rejissorla əvvəlcə danışmışdıq. Demişdi ki, montajdan sonra çəkiliş fərqli görünəcək. Vəd olunduğu kimi alınmadı. Ekran işini sildirdim. Heç yerdə yayımlanmayacaq. Əvəzində “Dastanlar” və “Gəl” mahnılarıma klip çəkdirəcəm”.

   Müğənni Xəyyam Nisanov türkiyəli ifaçı Ziynət Salini Bakıya gətirmək istəyir. İfaçı açıqlamasında Ziynətlə duet şəklində səsləndirdiyi “İstanbul” mahnısından bəhs edib: “Duetə klip də çəkdirmişik. Türkiyədə telekanallarda yayımlanacaq. Bakıda da təqdimat keçirəcəm. Ziynət Sali ilə Azərbaycanda konsert vermək istəyirəm. Bu işlə Murad Arif məşğuldur. Danışıqlar aparır”.

   Müğənni Niyam Salami bir neçə gün öncə dünyasını dəyişən türkiyəli ifaçı Kayahanın xatirəsinə mahnı ithaf edib. Sənətçi açıqlamasında mərhum Kayahanın repertuarından “Səni versinlər əllərə” adlı bəstəni lentə aldırdığını deyib: “Kayahanın ölüm xəbəri məni çox üzdü. Kiçik yaşlarımdan onun mahnılarına qulaq asmışam. Elə insanlar var ki, adları tarixə yazılır. Onlardan biri də Kayahan oldu. Dünyasını dəyişsə də, insanların yaddaşında qalacaq. "Səni versinlər əllərə" mahnısını oxudum, onun xatirəsinə ithaf etdim".

 

Əhəd Miriyev

 

Muz-Tv.az