Brilliant Dadaşova: ” Röya ilə duet planımız var”

Xalq artisti Brilliant Dadaşova və müğənni Röya Ayxan duet oxuyacaqlar. 

     Xalq artisti Brilliant Dadaşova və müğənni Röya Ayxan duet oxuyacaqlar. Axşam.az-ın məlumatına görə bu haqda Brilliant Dadaşova açıqlamasında  bildirib: “Röyanın səsini, xasiyyətini bəyənirəm. O da nəyisə əvvəlcədən danışmağı xoşlamır, mən də. Bir işi əvvəl reallaşdırmaq, sonra təqdim etmək lazımdır. Danışıqlarımız olub, duet planımız var. Zülfiyyə Xanbabayeva ilə də duet oxuyacam. Sadəcə, vaxtımız üst-üstə düşmür”.

    Müğənni Röya Ayxan və Zamiq Hüseynovun “Sevdim” duetinə klip çəkdirəcəkləri ilə bağlı xəbər vermişdik. Cütlüyün bu planı baş tutmayıb. Bu haqda Z.Hüseynovun prodüseri Elnur Həsənov deyib. “Bu mahnını Röya ilə Zamiq onlara yaxın bir ailənin istəyi ilə oxumuşdu. Həmin ailə bəstəni övladına ithaf etmişdi. Klip qərarını da onlar verməliydi. Yəni mahnının hüquqları onlara aid idi. Əvvəl klip çəkilməsini istəsələr də, sonra alınmadı. Ona görə də, mahnı klipsiz qaldı”. E.Həsənov iki sənətçinin küsülü olması xəbərinə də aydınlıq gətirib: “Klipin çəkilməməsi, Röya ilə Zamiqin son vaxtlar bir yerdə az görünməsi bu cür söz-söhbətlərə səbəb oldu. Amma onlar küsülü deyil. Münasibətləri, dostluqları həmişəki kimi davam edir”.

   “Eurovision 2011” mahnı müsabiqəsinin qalibi Nigar Camal sosial şəbəkədə xoşbəxt insanın necə olmasından yazıb. Yeni fotolarını paylaşan müğənni bunları qeyd edib: “Xoşbəxt insan keçmişi arzulamayan, gələcəkdən qorxmayan və başqasının həyatına müdaxilə etməyəndir”. 

    Müğənni-bəstəkar Ramal İsrafilov film çəkir. O, ssenarini özünün yazdığını və baş rolda çəkiləcəyini bildirib: “Sevgidən bəhs edən “Ramalın romanı” filminin çəkilişlərinə başlamışıq. Baş rolda özüm olacam. Ssenari də mənə məxsusdur. Çəkilişlərlə bağlı saçım, saqqalım uzanacaq, imicimdə dəyişikliklər ediləcək. Qarlı, yağışlı, günəşli havada çəkilişlər aparılacaq. Baş qəhrəman həyatda nəyisə axtara-axtara gedir. Sonda qocalır, ağsaqqal olur. Burada qoca kişini də özüm canlandıracam. Qrimlə saçımı ağardacam. Qəhrəman qocalır, amma həyat hekayəsi qocalmır”.

 

Əhəd Miriyev

 

Muz-Tv.az