Zülfiyyə Xanbabayeva : “Musiqimiz acınacaqlı haldadır”

Xalq artisti Zülfiyyə Xanbabayevaşou-biznesin hazırkı vəziyyətindən şikayətlənib.“

   Xalq artisti Zülfiyyə Xanbabayevaşou-biznesin hazırkı vəziyyətindən şikayətlənib.“Bu gün musiqimiz acınacaqlı haldadır. Bəlkə də, bunun günahkarı biz özümüz – həmkarlarımdır. Hazırda İnstaqramda yoxam, adıma açılmış profillər var. Sosial şəbəkədə olmaq istəmirəm, çünki insanlarımız aqressivləşib. Hamı pessimist olub. Elə bil, böyük günah işləmişik, müğənnilərə elə şərhlər yazırlar ki... Buna görə də, hələ ki, İnstaqramdan uzağam”. Z.Xanbabayeva müğənni-bəstəkar Eminlə duetindən də söz açıb: “Emin ilk dəfə Azərbaycan dilində oxudu. Birlikdə Müslüm Maqomayevin “Azərbaycan” mahnısını səsləndirdik. “Emin və dostları” adlı konsertdə təqdim edəcəyik”.

   Müğənni İlhamə Qasımova şou-biznesin qeyri-adi ifaçılarından danışıb. Sənətçi fərqli bir şey edən həmkarlarını qınayanlara cavab verib: “Bizdə qeyri-adi nəsə edənə başqa cür baxırlar, ələ salırlar. Amma dünya ulduzlarından kimsə fərqli nəsə edəndə alqışlayıb bəyənirlər. Əməkdar artist Elza Seyidcahan heyvanlara konsert verdi, hamı lağ elədi. Amma onu Ledi Qaqa etsəydi, xaricdəkilərin ağzı açıq qalardı. Müğənni sənətə gələndə özünü hansı imicdə görürsə, o cür də davam etməlidir. İfaçıları ələ salanların özlərinin elə gülməli cəhətləri var ki... Seçilən müğənnilər qarşısında baş əyirəm. Onları heç kimlə həyatı boyu səhv salmaq olmaz. Belə şeyə pis baxmıram. Əgər lazım olarsa, pul qarşılığında səhnədə qeyri-adi libaslar da geyinərəm. Məni əsas reklam tərəfi maraqlandırır”.

   Müğənni Ayan Babakişiyeva yeni fotosessiya etdirib. Sənətçinin uzun yarıqlı libası diqqət çəkib. A.Babakişiyeva bu libasını telekanallardan birinin Yeni il çəkilişi üçün hazırlatdığını bildirib.

   Xalq artisti Aygün Kazımovanın qızı, gənc müğənni İlqarə Kazımova imicində dəyişiklik edib. Yeni fotolarını sosial şəbəkədə paylaşan İlqarənin bu görünüşü müzakirələrə səbəb olub. Hər zaman qara saçlarla görülən ifaçı bu dəfə onları sarıya boyayıb. Hətta İ.Kazımovanın burnunu plastik əməliyyat etdirməsi də diqqətdən qaçmayıb. Qeyd edək ki, İlqarə bir neçə gün əvvəl İstanbulda klinikaların birində olduğunu bildirmiş, ancaq bunun səbəbini açıqlamamışdı. Sosial şəbəkədə digər müzakirə edilən mövzu isə sənətçinin koftası olub. Belə ki, izləyicilər koftanın üzərində xaç işarəsinin olmasını tənqid ediblər.

 

Əhəd Miriyev

 

Muz-Tv.az