Bakıda moda həftəsinin 7-ci mövsümü təşkil ediləcək

Bakıda mayın 17-dən 19-dək “Fairmont Baku Flame Towers” otelində “Azerbaijan Fashion Week” rəsmi moda həftəsinin yeddinci mövsümü keçiriləcək.

Muztv.az xəbər verir ki, ilk parlament respublikası - Azərbaycan Demokratik Cümhuriyyətinin 100 illiyi ilə əlaqədar “Azerbaijan Fashion Week”də bir sıra dəb nümayişləri təşkil olunacaq. Belə ki, 7-ci mövsümün qonaqları tanınmış azərbaycanlı modelyer-dizayner, Əməkdar İncəsənət Xadimi Fəxriyyə Xələfova, həmçinin Diana Əhədpur Kəngərli, Alex Chzhen, Yerlan Zholdasbek, Makhaim, Mak Mari kimi tanınmış dizaynerlər olacaq.

Moda həftəsi çərçivəsində “Azerbaijan Fashion Week” Azərbaycan qadınlarının gözəllik və dəb tarixinə dalmağa imkan yaradacaq. Gözləriniz önündə yüz il müddətində dəyişən obrazlar canlanacaq. Dəb həftəsinin qonaqları son əsrin dəb təkamülünün şahidi olacaqlar.

Üzümüzə gələn payız-qış mövsümü sürprizlər hazırlayır. Azərbaycan dizaynerləri inkişaf edir, güclənir, moda cəmiyyətinin yeni üzvlərinin sayı həndəsi silsilə üzrə artır. Əsas nümayiş proqramı ilə yanaşı, ənənəvi hala çevrilən “Showroom АFW” də təşkil olunacaq.