Məşhur bəstəkar və ifaçı Bakıda konsert verib

Heydər Əliyev Mərkəzində məşhur bəstəkar və ifaçı Qoran Breqoviçin konserti keçirilib.

Muztv.az xəbər verir ki, Qoran Breqoviç ötən gün Bakıdakı ilk konsertində rəhbərlik etdiyi orkestrin müşayiəti ilə çıxış edib. Elə ilk anlarda musiqinin sədaları altında səhnəyə çıxan orkestrin üzvləri tamaşaçılara gözəl bir gecə yaşadıblar. Nəhayət, səhnəyə çıxan Qoran Breqoviç orkestri tamaşaçılara təqdim edərək bu gecə, həmçinin öz bəstələrini ifa edib.

Gözəl musiqilər və oynaq ritmlərlə zəngin proqramda ifaçı məşhur filmlərə yazdığı, həm də dünyada populyarlıq qazanmış mahnılarını səsləndirib. Konsertin sonunda tamaşaçıların alqışları ilə bir daha səhnəyə qayıdan Qoran Breqoviç daha bir neçə mahnı səsləndirdi. Onun səsləndirdiyi “Maki Maki”, “Bella Çao” və “Kalaşnikov” mahnılarını isə auditoriya ayaqüstə ifa və alqışlarla qarşılayıb.

Qoran Breqoviçin müxtəlif musiqi mədəniyyətlərini duymaq və mənimsəmək bacarığı ona ayrı-ayrı xalqların nəğmələrini, eləcə də elektron musiqi elementlərini sintez etmək imkanı verir.

Xatırladaq ki, 20 ildən çoxdur bütün qitələrdə konsert verən musiqiçi indiyədək 3000-dən çox şou təqdim edib.