Xalq artisti Bakıda və Lionda konsert verəcək

Azərbaycanlı tenor, Xalq artisti Yusif Eyvazovun bu ilin may ayında Bakıda konserti gözlənilir.

Mtv.az xəbər verir ki, sənətkar iyulun 19-da isə Anna Netrebko ilə Lion şəhərində konsert verəcək.

Xatırladaq ki, tenor fevralın 7-də Paris Operasının “Gaveau” konsert zalında möhtəşəm solo konserti olub. Onu pianoda Enriko Reggioni müşaiyət edib.

Konsert çərçivəsində Yusif Eyvazov dünya şöhrətli bəstəkarlar Cüzeppe Verdi, Pyotr İliç Çaykovski, Sergey Rahmaninov, Françesko Paolo Tisti, Stanislao Qastaldon, Salvatore Kardilo, Rodolfo Falvo, Ernesto Dö Kurtis, Jorj Bize, Ciakomo Puççininin yaradıcılığına müraciət edib.

O, görkəmi bəstəkar Qara Qarayevin “Mən sizi sevirdim” və “Gürcüstan təpələrində” romanslarını da səsləndirib.

Konsertin ikinci hissəsində azərbaycanlı tenor səhnəni meksikalı bariton ifaçı Xuan Karlos Heredia ilə bölüşüb.

Y. Eyvazovun solo konsertinə təkcə Parisin deyil, Fransanın digər şəhərlərindən, eləcə də müxtəlif Avropa ölkələrindən operasevərlər gəlib.

Yusif Eyvazov bu şəhərdəki ilk solo konsertində bənzərsiz ifaçılıq üslubu ilə klassik musiqi sevərləri heyran qoyub.