Mətanət İsgəndərli və Elza Seyidcahan küsülülüyə son qoydular

Küsülü olan Əməkdar artistlər Mətanət İsgəndərli və Elza Seyidcahan barışıblar.

Muztv.az xəbər verir ki, müğənnilər toy məclislərinin birində birlikdə olublar. M.İsgəndərli mahnı oxuyarkən Seyidcahanan oynayıb. Həmin an müğənni Elzanın yanına gələrək onunla qucaqlaşıb, görüşüb. Seyidcahan da həmkarının barışıq addımına müsbət cavab verib.

Elza Seyidcahan Mətanət İsgəndərli ilə bağlı deyib: “Ona qarşı incikliyim düz olmuşdu. Ancaq bacılar arasında da söz-söhbət olur. Mətanət həmişə mənə sevgisini, hörmətini dilə gətirib, göstərib. Bu dəfə də göstərdi. Amma qızının toyunda mənə anlaşılmazlıq etmişdi. Söhbət heç də oxumaqdan getmir. Ülkər qızımızın xoşbəxtliyini görmək mənə bəs edərdi. Sadəcə, Mətanət xanım səhnə, mikrofon görəndə "cəzm" olur. Özü də mənim açıqlamamı bəyənib. Deyir, oxuyanda o qədər güldüm ki...”.

Xatırladaq ki, E.Seyidcahan açıqlamasında İsgəndərlini biabır etmişdi. İfaçıların küsülülüyünə səbəb Mətanətin qızı Ülkərin toyunda Elzaya oxumağa imkan verməməsi olmuşdu. O, qarşı tərəfin ünvanına “Qızının toyunda heç kimə oxumağa imkan vermədi. Elə bil solo konsert verirdi. Musiqiçilər belə yorulmuşdu. Gedirdi 5 dəqiqə otururdu, tez qayıdıb musiqiçilərin ifasını yarımçıq kəsib, öz mahnısını deyirdi. Musiqiçilər də axırda dedi ki, bizim repertuar başqadır. Toyda gördüyüm hadisənin şokundan ayılmamışam. Onun orada etdikləri bir filmin ssenarisi idi. Qız toyunda ana ağır olar. Hər şey oxudu” sözlərini deyib. (Axşam.az)